সম্পূর্ণ আকাশ ණ জ্যোতিষ কুমাৰ দেৱ

সম্পূর্ণ আকাশ
========
আধা আকাশ কেলেই তোমাক
হেৰা সম্পূর্ণা নাৰী
গোটেই আকাশ তোমাৰ প্রাপ্য
আৰু এটি ফান্দত তোমাক বান্ধে
মন-মোহনীয়া কথাৰে চাবা
আজি তুমি দাবীদাৰ সমমর্যাদাৰ
তাৰে হকদাৰও হোৱা তুমি
জয়ধ্বজা কঢ়িয়াব পাৰা অকলে
যি আকাশত উৰুৱাবা তাক
নেৰিবা তাৰ একাধিপত্যৰ অধিকাৰ
এই আকাশ শুৱাই তোলা তুমি
আপোন মনৰ মাধূৰী মিহলাই
লিখা তাতে তোমাৰ ব্যথাৰ মালিতা
ফুলোৱা তোমাৰ সপোনৰ ফুল
সজোৱা তোমাৰ সংসাৰ, তোমাৰ
বুকুত ভৰি লোৱা মুকুতিৰ নিঃশ্বাস
কোৱা উদাত্ত কণ্ঠেৰে, মই নাৰী
সর্বোপৰি মই এগৰাকী মানুহ
মোৰ কৰতলগত সমগ্র পৃথিৱী
তাৰ ওপৰৰ সমগ্র আকাশ মোৰে
হে পুৰুষ , তুমিও স্বাগত ইয়ালে
সম অধিকাৰেৰে, সুখে-দুখে, সসন্মানে ..

কবি:- ණ জ্যোতিষ কুমাৰ দেৱ