ৰং

ৰং
আকাশ চুবলৈ বিচাৰিলেও
ৰঙবোৰে এৰিব নোৱাৰে পৃথিৱীৰ মায়া
ৰঙেই চকুত সানি দিয়ে
ৰঙৰ মোহ
ৰঙনো কি
এমূৰে বগা আৰু এমূৰে কলা
মাজত বিবিধ তৰংগৰ
এডাল পোহৰৰ ৰেখা
ৰং সলোৱাবোৰৰ চকুৱে
পহৰা দি থাকে ৰঙবোৰক
উৰিবলৈ চেষ্টা কৰিলেই
পৰম্পৰাৰ চিতাত
তুলি দিয়া হয় ৰঙবোৰক
ৰঙে পিন্ধোতাৰ ভৰি-হাত বান্ধে
ৰঙে অজগৰ হৈ গিলে
ৰং বোৰ সানি ললেই জানো
ঢাকি ৰাখিব পাৰি
শুকাই যোৱা প্ৰাণৰ ৰং
ৰঙনো কি
মনিব নোৱৰা আন্ধাৰত
পোহৰ কণাৰ মায়াজাল
তাতে খেলা এজোলোকা বন্ধ বতাহ
-------দুলাল হাজৰিকা---