'খোজ'

'খোজ'

     -- দিব্যজ্যোতি বণিক্য
.
প্ৰথম খোজবোৰ আমাৰ
গতিৰ সূত্ৰপাত
থুপু-থাপাক খোজবোৰ
কেতিয়াৰ পৰা যে
তেজ কদমত চলিবলৈ লয়
বাঢ়নী নৈৰ পানীৰে গৰা খহাই
.
খোজৰ পিছত খোজত
চাৱনিৰ পিছত চাৱনি
মাতৰ পিছত মাত
যেন যান্ত্ৰিক তৎপৰতা
যুৱলীত বিৰঙি উঠা শামুকৰ খোলা
.
আমি গৈ থকাৰ দৰে
সকলোবোৰ নতুন নহয়
আনকি আমাৰ খোজবোৰো
.
মাতবোৰে যিদৰে বিচাৰি যায়
পুৰণি বাটবোৰ
দেই পুৰি নিয়া পুৰণি সূৰ্য্যটোৰ
ৰ'দৰ প্ৰখৰতাত
চাৱনিবোৰে বিচাৰি ফুৰে যিদৰে
পুৰণি বৃক্ষৰ ছাঁ
গৈ গৈ পৰি যোৱা
পৰি পৰি উঠা খোজবোৰৰ দৰে