এখন লিফ্ ট

এখন লিফ্ ট (আখৰুৱাৰ কবিতা -জুন ২০১৭)
-------------------
দুমহলীয়াই হওঁক বা তিনি মহলীয়া
পঁচিশ মহলীয়াই হওঁক বা পঞ্চাশ মহলীয়া
যদি আছে এখন লিফ্ ট
অনায়াসে অহা যোৱা
নাই কোনো শ্ৰম ।

চুইছ টিপিলেই কঢ়িয়াই লৈ যাব
হুৰ্ হুৰ্ হুৰ্ নিমিষতে ,
হাজিৰ হব দুৱাৰ মুখত ।

ইমান যে আৰাম
নাই কোনো শ্ৰম
নাই কোনো টেনচন
মাথো আঙুলিৰ টিপ বুটামত ।

আছে যদি আপোনাৰ জীৱনত
এখন লিফ্ ট
তেন্তে আৰামেই আৰাম
নাই কোনো সংগ্ৰাম
নাই কোনো সংঘাত
নাই কোনো জীৱন যুঁজ ।

মসৃণ , মসৃণ , মসৃণ আপোনাৰ জীৱন ।

হয়তো মাখন বৰণীয়া টাইছ লগোৱা
কোঠাৰ মজিয়াৰ দৰে
মসৃণ আপোনাৰ জীৱন ।

কথা এষাৰ কওঁ নে ??

আপুনি যদি জীৱনত শ্ৰমেই কৰা নাই
মুখামুখি হোৱা নাই যদি সংঘাতৰ
এবাৰো অৱতীৰ্ণ হোৱা নাই যদি
জীৱন যুঁজত ,
তেন্তে আপুনি কোনো দিন
বুকু ডাঠি কব নোৱাৰিব
জীৱন জীৱন বৰ অনুপম
বৰ অনুপম ।।
---------------------------
বিনু ফুকন । ১৭/৬/২০১৭ ।