ঠিকনা

সঠিক কৈ মনত নাই
ঠিক কেতিয়াৰপৰা
অচিন বাটটোত
বিচাৰি ফুৰিছিলোঁ ঠিকনাটো৷

ধৰিবই পৰা নাছিলোঁ বহুদিনলৈ
আচলতে ঠিকনাটো হেৰাইছিল কাৰ?
মোৰ নে তোমাৰ?

ৰামধেনুৰ ৰঙবোৰ মই দেখা নাছিলোঁ৷
কেতিয়াওঁ শুনা নাছিলোঁ শব্দবোৰ৷
অনুভূত হোৱা নাছিল ভালপোৱাৰ স্পৰ্শও৷

অথচ ঠিকনাটোৱে মোৰ ঠিকনাত
ঠিকেই টোকৰ মাৰিছিল৷

শিলৰ হৃদয়ত খোপনি নাপাই
হেৰাই গৈছিল ঠিকনাটো৷

ৰামধেনুৰ ৰঙবোৰে মনত ৰাখিছিল প্ৰতিশ্ৰুতিৰ৷

ফলশ্ৰুতিত
পৰুৱাই পোৱা বাটটোত
ঠিকনাই বিচাৰি ফুৰে ঠিকনাক৷


ইন্দিৰা দিগন্ত