দিনকণাৰ কথাৰে

দিনকণাৰ কথাৰে
''
১/
আমি কোৱা কথাবোৰ বুঢ়ীআইৰ সাধু
চন্দুকৰ চুকত পৰি থাকোঁতে থাকোঁতে মামৰ লাগিল
কাৰো চকু নপৰিল
কাৰো হাত নালাগিল
ফেৰিৱলাৰ গাড়ীত উঠি ঘূৰি ফুৰিলে
আপোনাৰ চহৰ

২/
ক'ৰ পৰা এটা আৰম্ভণি হ'ব পাৰে ?
আঙুলি এটাৰ ইচাৰাত দৌৰোঁতে দৌৰোঁতে
এদিন আমি খহি পৰিম
এদিন আমাৰ কথাবোৰ
এখন ইতিহাস হ'ব
দিনকণাৰ বুৰঞ্জী পঢ়ি কোনোবাদিনা
উত্তৰপুৰুষে হুমুনিয়াহ এৰোঁতে
আমি হয়তো খহি পৰিম দ্বিতীয়বাৰ
৩/
কাইলৈৰ পৰা আমি ভাল হ'ম
কাইলৈৰ পৰা আমাৰ ভাল হ'ব
চৰাই এজনী হৈ উৰি যোৱা দিনটোলৈ
মূৰ তুলি চাই আকৌ এবাৰ
সংকল্পবদ্ধ হ'ল
এজাক নাইপিয়া সাপ

ৰিতুৰাজ বৰুৱা