শৰত, শেৱালি ইত্যাদি

শৰত, শেৱালি ইত্যাদি

১
তলসৰা শেৱালিৰে পূৰ্ণ পদূলি
হাতত কুকি লৈ এটি প্ৰাণোচ্ছল প্ৰাণ
হিয়াৰ সুঘ্ৰাণ কিটো বুজে তাই
মাথোঁ দেও দি দি ধপলিয়াই
এটা ফুলো অনাদৃত নহওঁক!
২
নিয়ৰৰ চুমাত লেতুসেতু লাজুকীলতা
আলফুলে সাৱটে টোপাল
ৰং সনাৰ ছলেৰে বৰ্ণিল লাস্যময়ী কিৰণে
হৰি নিয়ে স্নিগ্ধ প্ৰভাত।
শৰতৰ শ্বাশ্বত ছন্দ
দোকোলটোকা অনুভৱৰ জোৱাৰ ।
৩
শৰত আজি অভিমানী আকাশ
অস্ফুট কলৰবত ৰুক্ষ বতাহ
পূজাৰ অপেক্ষা মৌনতাৰ বিলাপ।
শৰতে কঢ়িয়াই বিজয়াৰ বিফলতা
ডাৱৰে কঢ়িয়াই আকাশৰ বেথা
কেতিয়াবা শূন্যতাই আকাশ আছিল
আজি আকাশো শূন্যতা।
৪
হোৱাট্চএপৰ মেছেজত শেৱালি ফুলিল ,
গোন্ধহীন শেৱালি নে ঘ্ৰাণহীন অতীত!
ফেচবুকৰ আপডেটৰ সোণোৱালী আঘোণ,
পোতখোৱা লেছেৰি নে সমাধিস্থ সময়!
নিজৰ পৰা নিলগত গলি পৰা মুহূৰ্তবোৰ
বন্দী নিশ্বাসৰ বিষাক্ত উকমুকনিত
স্তূপীকৃত অনুভৱেৰে হিয়া প্ৰস্তৰ হয় ।

###মনমী