দ্বিতীয় স্থানপ্ৰাপ্ত কবিতা:-"ছাঁবোৰ দীঘল হৈছে": কবি:-দীপালি দুৱৰা

ছাঁবোৰ দীঘল হৈছে
নাঙঠ গছৰ ফেৰেঙণিত বহি আছে
ৰাতোৱাল ফাগুন ।
.
যোগিনীৰ বুকুত উতনুৱা আবেলি
গাঁৱৰ ধূলিময় বাটত
ফাগুন উৰিছে ।
.
নীলা গৰখীয়াটো চহৰমুখী হোৱা বহুদিন হ'ল
তাই নাজানে চহৰৰ কোনটো গলিত 
সি ওলমাই থৈছে তাৰ নাম-ফলক ।
.
ফাগুনৰ সতে তাই মিতিৰালি পাতিছে
ফাগুনে যদি কেনেবাকৈ আনি দিব পাৰে
গৰখীয়াটোৰ ঠিকনা ।
.
যদিও তাই জানে
চহৰত ফাগুন এতিয়া শয্যাগত ৰমনী ।