তৃতীয় স্থানপ্ৰাপ্ত কবিতা: "ফাগুন" :- কবিঃ ৰূপম সাউদ

মদাৰ ৰঙা নৈপৰীয়া আলিটোত
ডেউকা মেলা তুলাবোৰে বাট বেৰিছে
সৰিয়হৰ গোন্ধ এটাই আঁকুহিছে মোক
দৰিয়া ঘাটত শুকুলা বালিচৰ
উতলা বতাহ
কঁপিছে ঝাওবন
অগা-ডেৱাকৈ নাচি আছে দুখনি চিলা
এয়া ফাগুন -
পলাশ ফুলাৰ বতৰ
বগৰী পকাৰ লগন
আবীৰৰ উৎসৱ
ফাগুনে গুঁজি যায় লঠঙা ডালত
বসন্তৰ ঠিকনা
পোখা মেলে সংগোপনে
হেঁপাহৰ
উদঙীয়া গৰুবোৰ চৰাই
অলপপৰ আগেয়ে
এই বাটে গৈছে কোনো ডেকা গৰখীয়া
ওঁঠত তাৰ উতনুৱা সুঁহুৰি
ঘৰমুৱা খোজত গালে মুখে লাগিল
ফাগুনৰ ৰং
ডেও দি উৰিল
মোৰ দুভৰি
মানুহজনীয়ে হ'বলা এই পৰত
যঁতৰত সূতা পকাইছে…