মা

আজি মাতৃ দিৱস।মোৰ মা নাই।তথাপি প্ৰতি পলে অনুভৱ কৰো তেওঁ মোৰ চৌপাশ আৱৰি আছে ।

মাতৃ দিৱসৰ শুভেচ্ছাৰে কবিতা এটি আগবঢ়ালো।

মা
মা দুনাই নকও তোমাক ভাল পাওঁ বুলি
মাথো কঢ়িয়াই ফুৰো
মৌ সনা মাতৰ বৰ্ষা অৰণ্য
উমাল বুকুৰ আভিজাত্য
তোমাৰ
আঙূলিৰ পাবত গজি উঠা
মাধবী লতাই
মোৰ আত্ম বিশ্বাস
কোনে কয়
তুমি নাই
তুমি নাই
মই জানো
তুমি মোৰ আভ্যন্তৰৰ
সমস্ত কোঠাৰ ৰেঙনি
চকু মুদিলেই দেখা পাওঁ
তোমাৰ
সুখৰ চকুত দুখৰ চকুত
ফুলি উঠা মৰুৰ ফুল
বুকুত গছি উঠা
গধূলি গোপাল
থাপনাৰ কাকূতি
নখচুকাত লাগি ৰোৱা বোকাৰ ছবি

আমি হেনো
নদী বুকুত জী থকা মাছ
জীৱনৰ সতে সহযাত্ৰী হৈ
জী আছো
জী থাকো তোমাৰ
পঢ়াশালিৰ পাঠ লৈ
তোমাৰ সুবাসৰ ফুল
মোৰ প্ৰিয় ফুল
তোমাৰ গানেই মোৰ প্ৰিয় গান
মোৰ প্ৰিয় ছবি
তোমাৰ থাপনাৰ নতশিৰ
তুমিয়ে মোৰ
গৰিয়সী স্বৰ্গাদপী
জনমে জনমে
তোমাৰ বুকুৰ অমৃত পিয়াসী মই
তুমিয়ে মোৰ অৰণ্য
তুমিয়ে মোৰ আকাশ
তুমিয়ে মোৰ সন্ধানী পথৰ
আলোকৰ সহযাত্ৰী ।